شوفنا بجدد

بسم الله الرحمن الرحيم
انا من شويه صغيره قريت تدوينه ريم البنوته اللذيذه واللى تعتبر معيده في قسم اعلام وصحافه الكترونيه وعامله كام مدونه علي النت وكمان بتعمل موقع خاص بقضايا المعاقين -زوجي هو اللي عامل التصميم بتاعه- اللي بتتكلم فيها عن انواع الاعاقات (الذهنيه ) من وجهة نظر المتخصصين بصراحه انا زعلت اوي واتضايقت من التصنيف الظالم ده، وقررت اني لازم ارد عليها لانها ظلمت نفسها -والى بعتبرها عن نفسى من الشخصيات المتميزة إنسانياً وثقافياً وعقلياً- وظلمت ناس تانيه كتير، انا والحمد لله من اللي ربنا انعم عليهم بالاعاقه بس انا اعاقتي كانت بسبب حادث وانا عندي 14 سنه، وفي أثناء مرحله الجامعه اللي والحمد لله وصلتلها وخلصتها وانا معاقه كنت اتعرفت علي رياضات المعاقين، وبينما نحن في الاتوبيس ورايحين معسكر نلعب فى البطولة جه واحد بيقولي بعد اذنك يا انسه كنت واقفه في طريقه وهو عاوز ينزل من الاتوبيس، الشخص ده كان اسمه هاني وده بالمناسبه كان زميل من جامعه اخري وكان بيلعب (جري )، انا ساعتها استغربت اوي لانه قالها بشكل غريب قلت ده شكله (اعاقه ذهنيه ) -دخل الجامعه ازاي ده- بس وعرفت بعد كده انه الاعاقه دي اسمها CP

، المهم مرت الايام واتخرجت وبعد فتره اتعرفت علي شخص عن طريق الانترنت واتكلمنا كتير وعرفت انه معاق وانه اعاقته اسمها C P

الشخص ده بيشتغل مترجم مواد طبيه واداريه في مكان العالم كله بيشهد انه صرح عالمي ويشاء السميع العليم انى اقع فى حب هذا الشخص ويصبح زوج أحلامى اللى ماكنتش اتوقع انها هتتحقق فى يوم، ودلوقتى انا بس عاوزه اسأل سؤال كام واحد سليم او بمعني اخر معندوش اي اعاقه بيستسهل الحياه ويقضيها وخلاص اي تعليم واي شغل ولو مفيش ولا تعليم ولا شغل ادينا قاعدين في الشوارع وعلي النواصي وكمان كام حد (معاق ذهنيا ) يقدر يدرس في الجامعه صحافه الكترونيه ويترجم مواد طبيه لصرح عالمي عارفين انا زعلت من ريم لانها ما وضحتش انه اللي بيعتبر كل

الC P اعاقه ذهنيه غلطان او بالاخص عندنا هنا سوء تصنيف للاعاقات وده اصلا بيعوق انهم يشتغلوا بامكانياتهم الحقيقه وسوء تشخيص الاعاقات وسوء المستوي الطبي اللي بيخلي الاطباء يسالوا اعاقتك ايه -وانا فى الكمسيون الطبى لعمل ترخيص الحصول على سيارة مجهزة- عشان يكتبو تقريرهم مفروض هو يقولي مش انا اللي اقوله وده يا جماعه والله تجربه شخيصه كتير جدا من الاطباء لما بييجوا يصنفوني (يعني انتي عندك ايه ) (طب هو انتي واقفه ازاي ولا ماشيه ازاي؟) عارفين ليه الاسئله دي لان التقارير اللي قدامهم بتقول انه مستحيل امشي بس اانا بمشي وواقفه قيسوا بقي انتوا كل ال CP

نفسي الناس تشوفنا بجد ما تشوفش الورق وتقول هو ده وخلاص

غـديـــــر